Ağdam zəlzələsinin detalları
Azərbaycan Milli Elmlər Akademiyasının Respublika Seysmoloji Xidmət Mərkəzi 15 noyabr zəlzələsinin episentri və zəlzələnin hiss olunduğu ətraf rayonlarda tədqiqat aparıb.
Noyabrın 15-i saat 23:48-də Ağdam ərazisində baş vermiş zəlzələnin tədqiqi zamanı müəyyən olunub ki, zəlzələ episentrdə 6 bal intensivliyinə qədər hiss edilib. Zəlzələnin episentri Ağdam rayonunun Quzanlı yaşayış məntəqəsindən 5 kilometr şimal-qərbdə yerləşib, pleysoseyst zonasının ölçüləri 24×28 kilometr, ocağının dərinliyi 25 kilometr olub.
Rəsmi hesabata görə, zəlzələ inzibati baxımdan ən yüksək intensivliklə Ağdam, Bərdə və Tərtər rayonlarının bir sıra yaşayış məntəqələrində hiss olunub. Bunlar Quzanlı, Poladlı, Üçoğlan, Xındırıstan, Çəmənli, Hüsənli, Köçərli, Xanərəb, Qazyan, Qaynaq, Evoğlu, İlxıçılar, Xəsili, Kətəlparaq, Qaravəlli və Xanaqala kəndləridir.
Evlərdəki çatların əvvəllər baş vermiş zəlzələlər və 2016-cı ilin aprel döyüşləri nəticəsində əmələ gəlməsi, bu zəlzələnin isə həmin çatları bir qədər də böyütməsi, qəzalı evlərin isə bir qədər də acınacaqlı hal alması müəyyən olunub.
Xəbəri AZƏRTAC yayıb.
