Yerevandan Moskvaya cavab, Bakıya şərt
Rəsmi Yerevan Rusiyanın xarici işlər naziri Sergey Lavrovun Azərbaycanı Avrasiya İqtisadi İttifaqına çağıran açıqlamasına münasibət bildirib.
Noyabrın 20-si Bakıda “ADA” Universitetində görüş keçirən Rusiyanın xarici işlər naziri Sergey Lavrov çıxışında deyib ki, Moskva Azərbaycanı Avrasiya İqtisadi İttifaqında görməkdən məmnun olar.
2014-cü ildə yaradılmış Avrasiya İqtisadi İttifaqına Rusiya, Qazaxıstan, Belarus, Ermənistan və Qırğızıstan daxildir. Bu il Moldova Avrasiya İqtisadi İttifaqında müşahidəçi statusu alıb. Tacikistanın təşkilata daxil olması məsələsinə də baxılır.
Noyabrın 23-ü Yerevanda jurnalistlərə açıqlama verən Ermənistanın xarici işlər nazirinin müavini Şavarvş Köçəryan deyib ki, Azərbaycanın Avrasiya İqtisadi İttifaqında hətta müşahidəçi statusunda yer almasının şərti var. Nazir müavini Avrasiya İqtisadi İttifaqının sənədlərində üzv ölkələrin bir-birinə qarşı addım atmaması barədə müddəaların olduğunu xatırladıb: “Azərbaycan bu və ya digər formada Avrasiya İqtisadi İttifaqına yaxınlaşmaq istəyirsə, Ermənistanın blokadasını aradan qaldırmalıdır. Biz Azərbaycanın Avrasiya İttifaqına üzvlüyünü və ya bu qurumda müşahidəçi statusu almasını alqışlayarıq. Ancaq bunun üçün Azərbaycan Ermənistanın blokadasını aradan qaldırmalı, hərbi əməliyyatlara və ermənilərə nifrət təbliğatına son qoymalıdır”.
1988-ci ildə Ermənistan Azərbaycanın Dağlıq Qarabağ bölgəsini ələ keçirmək üçün təcavüzə başlayıb. 1991-ci ildən sürətlənən hərbi təcavüzdə Dağlıq Qarabağ və onun ətrafındakı 7 rayon işğal edilib. 1994-cü ildən bəri sülh danışıqları nəticə vermir.
Azərbaycandan Ermənistana, oradan isə Naxçıvan Muxtar Respublikasına gedən nəqliyyat yolları müharibə vaxtı bağlanıb.
