Yağış, leysan, qar…
Ekologiya və Təbii Sərvətlər Nazirliyinin Milli Hidrometeorologiya Departamenti bildirir ki, noyabrın 22-si gündüzdən 23-ü səhərədək Azərbaycanda sərt hava şəraiti hökm sürüb, yağış yağıb, bəzi yerlərdə leysan xarakterli intensiv olub, dağlıq və dağətəyi rayonlara qar düşüb.
Şimal-qərb küləyinin əsdiyi, Bakıda və Abşeron yarımadasında və bəzi rayonlarda arabir gücləndiyi qeyd edilir.
Düşən yağıntının miqdarı Bakıda və Abşeron yarımadasında 1, Lənkəran-Astara zonasında 42, Böyük Qafqazda 25, Kiçik Qafqazda və Mərkəzi Aran rayonlarında 9, Naxçıvan Muxtar Respublikasında 4, Qazax-Gəncə zonasında 3 millimetrə çatıb.
Qarın qalınlığı Sarıbaş və Xınalıqda 22, Şahdağda 21, Qusarda 6, Gədəbəydə 5, Başdaşağıl və Altıağacda 4, Daşkəsən və Kişçayda (Şəki) 2, Qubada 1 santimetr olub.
Quba, Qusar və Xızı rayonlarına qar yağdığını xəbər verən AZƏRTAC temperaturun mənfi 2-8 dərəcəyədək endiyini bildirir. Dağlıq ərazilərlə yanaşı Quba və Qusarın rayon mərkəzlərinə də qar düşüb.
Quba Regional Hidrometeorologiya müəssisəsindən verilən məlumata görə, dağlıq ərazilərdə qar hazırda da yağmaqda davam edir.
