“Qarabağ”ın əli üzüldü
UEFA Çempionlar Liqasının qrup mərhələsində Azərbaycanı təmsil edən “Qarabağ” komandası 5-ci turu geridə qoyub. Novator.az-ın məlumatına görə, C qrupunda yarışan “Qarabağ” noyabrın 22-si Bakıda İngiltərənin “Çelsi” komandasını qəbul edib. Hakimin yanlış qərarları ilə 19-cu dəqiqədən azlıqda oynayan, qapısına iki haram penalti təyin olunan Ağdam klubu uduzub (0:4) və Avropa kuboklarından ələnib. “Çelsi” isə 1/8 finala yüksəlib.
İspaniyanın “Atletiko” və İtaliyanın “Roma” klubları Madriddə üz-üzə gəliblər. Bu oyunda meydan sahibi 2:0 hesabı ilə üstün olub.
Qrup mərhələsindən növbəti raunda adlamaq üçün ən azı ikinci yeri tutmaq gərəkdir. Üçüncü yeri tutan komanda Avropa Liqasına transfer olunur.
Beş turdan sonra C qrupuna 10 xalla “Çelsi” liderlik edir. “Roma” 8 xalla ikinci, “Atletiko” 6 xalla üçüncüdür. 2 xalla sonuncu pillədə dayanan “Qarabağ” bütün şanslarını itirib.
Qrupda son oyunlar dekabrın 5-də keçiriləcək, “Çelsi “ Londonda “Atletiko”nu, “Roma” İtaliya paytaxtında “Qarabağ”ı qəbul edəcək.
22 noyabr oyunlarından sonra D qrupundan “Barselona” da (İspaniya) növbəti mərhələyə adlayıb.
B qrupundan “Bavariya” (Almaniya) və PSJ (Fransa), F qrupundan “Mançester Siti” (İngiltərə), G qrupundan “Beşiktaş” (Türkiyə), H qrupundan “Tottenhem” (İngiltərə), “Real” (İspaniya) 1/8 finala vəsiqəni daha əvvəl təmin ediblər.
