Nazirlər Kabinetinin portalı yenilənir
Nazirlər Kabinetinin rəsmi portalı dizaynını yeniləyir. Novator.az-ın məlumatına görə, noyabrın 23-də Cabmin.gov.az-ın görkəmi dəyişib, ancaq hələlik sayta materiallar yerləşdirilməyib.
Hökumətin rəsmi portalında “Kabinetin strukturu”, “Kabinetin tərkibi”, “Sənədlər”, “Xəbərlər”, “Qəbul günləri” və s. bölmələr olacaq.
Azərbaycan Konstitusiyasında Nazirlər Kabinetinin statusu prezidentin yuxarı icra orqanı kimi müəyyən olunub. Ana qanuna görə, prezidentə tabe olan, onun qarşısında cavabdehlik daşıyan qurumun əsas səlahiyyətləri dövlət büdcəsinin hazırlanması və icrası, maliyyə-kredit və pul siyasətinin, dövlət iqtisadi və sosial proqramlarının həyata keçirilməsi, nazirliklərə və digər mərkəzi icra hakimiyyəti orqanlarına rəhbərlikdir.
