Əməliyyat necə başa çatıb?
Gürcüstanın paytaxtı Tbilisinin İsani-Samqori rayonunda terrorçuluqda şübhəli bilinən şəxslərə qarşı noyabrın 22-nə keçən gecədən aparılan əməliyyat dünən axşam başa çatıb. Novator.az-ın məlumatına görə, çoxmərtəbəli yaşayış binasının mənzillərindən birində qərar tutmuş şəxslərlə atışmada Dövlət Təhlükəsizliyi Xidmətinin 1 əməkdaşı həlak olub. Dövlət Təhlükəsizliyi Xidmətinin 2, Daxili İşlər Nazirliyinin 1 əməkdaşı yaralanıb.
Terrorçuluqda şübhəli bilinən 3 nəfərin öldürüldüyü, 1 nəfərin tutulduğu xəbər verilir. Onların kimliyi açıqlanmır. Qeyd olunur ki, onlar təslim olmaq barədə xəbərdarlığa məhəl qoymayaraq xüsusi təyinatlılara müxtəlif silahlardan atəş açıblar. Əməliyyat 20 saatadək davam edib.
