Ermənistanla sərhəddə Azərbaycan əsgərinin meyiti aşkarlanıb
Naxçıvan Muxtar Respublikasının Ordubad rayonu istiqamətində qoşunların təmas xəttində, Ermənistan silahlı qüvvələrinin mövqeləri yaxınlığında Azərbaycan əsgəri Bəhrüz Pərviz oğlu Cəlilbəylinin meyiti aşkarlanıb.
Bununla bağlı noyabrın 23-də Azərbaycanın Müdafiə Nazirliyi məlumat yayıb.
Məlumatda deyilir ki, əsgər hərbi cinayət törətdikdən sonra xidmət yerini özbaşına tərk edib.
1998-ci il təvəllüdlü Bəhrüz Pərviz oğlu Cəlilbəylinin 2017-ci ilin yanvarında Sədərək rayonundan həqiqi hərbi xidmətə çağırıldığı bildirilir.
Müdafiə Nazirliyi açılmış cinayət işi üzrə istintaqın davam etdirildiyini xəbər verir.
Məsələ ilə bağlı Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası da açıqlama yayıb.
Açıqlamada deyilir: “Ermənistana aid kütləvi informasiya vasitələrində bu ölkənin Müdafiə Nazirliyinə istinadla yayılmış məlumata əsasən, 2017-ci il noyabrın 23-də Ermənistan-Azərbaycan sərhədinin cənub-qərb istiqamətində, qoşunların təmas xəttində Azərbaycan hərbçisinin meyiti aşkarlanıb.
Yayılmış məlumatın araşdırılması və təsdiq ediləcəyi təqdirdə meyitin qaytarılması üçün Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası aidiyyəti beynəlxalq təşkilatlara müraciət edib.
Məsələ ilə bağlı təxirəsalınmaz tədbirlər davam etdirilir. Bu barədə ictimaiyyətə əlavə məlumat veriləcək”.
