10 ayda Naxçıvan iqtisadiyyatı 1,7 faiz artıb
2017-ci ilin yanvar-oktyabr aylarında Naxçıvan Muxtar Respublikasında 2,1 milyard manatlıq ümumi daxili məhsul istehsal olunub, bu da 2016-cı ilin müvafiq dövrü ilə müqayisədə 1,7 faiz çoxdur.
Muxtar respublikanın Dövlət Statistika Komitəsindən AZƏRTAC-a bildirilib ki, bir nəfərə düşən ümumi daxili məhsulun həcmi 2016-cı ilin müvafiq dövrü ilə müqayisədə 4,6 faiz artaraq 4686,2 manata çatıb.
Ümumi daxili məhsulun tərkibində ilk yeri sənaye tutur. Sənayedə 808,5 milyon manat dəyərində məhsul istehsal edilib, bu da 2016-cı ilin müvafiq dövründəki göstəricini 1,5 faiz üstələyib.
Yanvar-oktyabr aylarında 366,9 milyon manatlıq kənd təsərrüfatı məhsulu istehsal olunub. Bu, 2016-cı ilin müvafiq dövrü ilə müqayisədə 4 faiz çoxdur.
