Fikrət Hüseynlini yenə tutmaq istəyirlər
Ukrayna paytaxtı Kiyevdə tutulan və bir neçə gündən sonra azadlığa buraxılan azərbaycanlı jurnalist Fikrət Hüseyni ilə bağlı məsələ hələ tam həllini tapmayıb.
Fikrət Hüseynli Azərbaycanı 2008-ci ilin əvvəlində tərk edib və həmin vaxtdan Niderland Krallığında yaşayır. 2014-cü ildən o, bu ölkənin vətəndaşıdır.
Bakıda Fikrət Hüseynliyə Azərbaycan Respublikasının dövlət sərhədini qanunsuz olaraq keçmə və dələduzluq ittihamları ilə cinayət işi açılıb. Bir neçə il qabaq başlanan bu cinayət işi ilə əlaqədar Fikrət Hüseynli axtarışa verilib.
2017-ci il oktyabrın 14-də Fikrət Hüseynli Azərbaycanın İnterpola verdiyi sorğu əsasında Kiyevin Borispol hava limanında saxlanıb.
Oktyabrın 17-də Borispol Rayon Məhkəməsi onun barəsində 18 gün müddətinə həbs qətimkan tədbiri seçib.
Oktyabrın 27-də isə məhkəmə Fikrət Hüseynlinin Azərbaycana ekstradisiya olunmasına dair Kiyev Şəhər Prokurorluğunun vəsatətini rədd edərək jurnalisti zaminə buraxıb.
“Amerikanın səsi”nə açıqlamasında Fikrət Hüseynli deyib ki, Kiyev prokurorluğu onun zamində olması ilə razılaşmır və buna görə də məhkəmənin oktyabrın 27-də çıxardığı qərardan protest verib.
Protestə noyabrın 30-u Kiyev Şəhər Apellyasiya Məhkəməsində baxılmalıdır.
Fikrət Hüseynli bildirib ki, o, hazırda Kiyevdədir: “Prokurorluq pasportumu hələ qaytarmayıb. Buna məhkəmə qərar verməlidir. Hiss olunur ki, prokurorluq Azərbaycan hakimiyyəti ilə sövdələşmənin həyata keçirilməsinə cəhd edir”.
Jurnalist qeyd edib ki, istintaqın qərarına əsasən, o, ilin sonunadək Ukraynada qalmalıdır: “Bundan sonra məhkəmə mənimlə bağlı yenidən qərar verməlidir”.
41 yaşlı Fikrət Hüseynli vaxtilə “Azadlıq” qəzetinin əməkdaşı olub. Son vaxtlar isə xaricdən yaylan “Turan TV” ilə əməkdaşlıq edir. “Turan TV”nin Azerbaycansaati.com saytı Azərbaycan Respublikası ərazisində məhkəmə qərarı ilə bloklanıb.
