Mənəvi Dəyərlərin Təbliği Fondu ilə bağlı yeni qərarlar
Nazirlər Kabineti Mənəvi Dəyərlərin Təbliği Fondunun işçilərinin say həddini və aylıq vəzifə maaşlarını təsdiqləyib. Novator.az-ın məlumatına görə, qurumun 15 işçisi olacaq. Aylıq vəzifə maaşları belədir:
İcraçı direktor – 1150 manat
İcraçı direktorun müavini – 895 manat
Şöbə müdiri, baş mühasib – 590 manat
Baş məsləhətçi – 410 manat
Aparıcı məsləhətçi – 390 manat
Məsləhətçi – 380 manat
Kargüzarlıq və arxiv işinin aparılması üzrə mütəxəssis – 200 manat
Sürücü – 220 manat
Xadimə – 155 manat.
Mənəvi Dəyərlərin Təbliği Fondu Dini Qurumlarla İş üzrə Dövlət Komitəsinin tabeliyində yaradılır. Prezident İlham Əliyevin oktyabrın 10-da imzaladığı fərmanla fondun nizamnaməsi təsdiq edilib. Fərmana əsasən, fond mənəvi dəyərlərin qorunmasına və inkişafına, bu sahədə sosial layihələrin reallaşdırılmasına, habelə vətəndaşların dini etiqad azadlığının həyata keçirilməsinə dövlət dəstəyi göstərən qeyri-kommersiya hüquqi şəxsdir.
Qurumun saxlanması və fəaliyyətinin təmin edilməsi dövlət büdcəsindən ayrılan vəsait, habelə kreditlər, qrantlar və texniki yardımlar, fiziki və hüquqi şəxslərin ianələri və qanuna uyğun əldə etdiyi digər vəsaitlər hesabına həyata keçirilir. Onun nizamnamə kapitalı 100 min manatdır və dövlət büdcəsinin vəsaiti hesabına formalaşır.
Fondun fəaliyyətinə ümumi nəzarəti beş üzvdən ibarət Himayəçilik Şurası həyata keçirir. Cari rəhbərlik icraçı direktorun səlahiyyətindədir.
Himayəçilik Şurasının üzvlərini Dini Qurumlarla İş üzrə Dövlət Komitəsinin sədri vəzifəyə təyin və vəzifədən azad edir. Onların səlahiyyət müddəti 5 ildir və təkrar müddətə təyin edilə bilərlər.
İcraçı direktorun təyinatı da komitə sədrinə həvalə olunub.
