Nümayiş
Müdafiə naziri general-polkovnik Zakir Həsənov Azərbaycana rəsmi səfər edən özbəkistanlı həmkarı, general-mayor Əbdüsalam Əzizovla birgə hərbi hissəni ziyarət edib. Nazirlərə hərbi hissə haqqında ətraflı brifinq təqdim edilib, şəxsi heyət üçün yaradılan şəraitlə praktiki tanışlıq keçirilib.
Əsgər yeməkxanası, yataqxanalar, inzibati və xidməti otaqları ziyarət edildikdən sonra qonaqlara hərbi hissənin silahlanmasında olan hərbi texnika, silahlar və digər döyüş vasitələri barədə ətraflı məlumat verilib.
Mod.gov.az-ın məlumatına görə, həmin gün – noyabrın 16-da müdafiə nazirləri əvvəl təkbətək, sonra nümayəndə heyətlərinin iştirakı ilə geniş tərkibdə görüş keçiriblər. Azərbaycanla Özbəkistan arasında hərbi, hərbi-texniki, hərbi təhsil sahələrində əməkdaşlığın inkişaf etdirilməsi, mütəxəssislərdən ibarət qrupların qarşılıqlı səfərlərinin təşkili, o cümlədən maraq doğuran digər məsələlər barədə ətraflı fikir mübadiləsi aparılıb, yekunda Azərbaycan Respublikası ilə Özbəkistan Respublikası arasında 2018-ci il üçün ikitərəfli hərbi əməkdaşlıq planı imzalanıb.
Özbəkistan nümayəndə heyəti Silahlı Qüvvələrin Baş Qərargahının inzibati binasına da baş çəkib. Mərkəzi Komanda Məntəqəsinə gələn qonaqlar birliklər və qoşun növləri ilə birbaşa video əlaqəsi saxlayıblar.
