“Kütləvi çıxarış” 11 mindən çox vətəndaşa xidmət edib
Əmlak Məsələləri Dövlət Komitəsi noyabrın 17-si Yevlax rayonunda “Kütləvi çıxarış” kampaniyası keçirib. Kampaniya rayonun bir neçə kəndini əhatə edib, 50 rayon sakininə birbaşa yaşadıqları ərazilərdə əmlaklarına dair çıxarışlar təqdim olunub. Çıxarışlar əsasən fərdi yaşayış evləri, pay torpağı, həyətyanı torpaq sahələrini əhatə edib. Bununla yanaşı 30 sakindən gələcəkdə öz əmlaklarına dair çıxarış almaq üçün ilkin sənədlər qəbul edilib.
Vətəndaşlara hüquqi yardım xidmətləri də göstərilib. Bu xidmətdən altmışa yaxın sakin yararlanıb.
“Kütləvi çıxarış” kampaniyası zamanı ilkin qeydiyyat üçün sənədlər qəbul edilərkən birbaşa olaraq çöl-ölçmə işləri də aparılır. Bununla da qeydiyyat prosesində vaxt itkisi tamamilə aradan qaldırılır.
Rəsmi hesabata görə, ümumilikdə 60-dan çox “Kütləvi çıxarış” kampaniyası keçirilib. İndiyədək 11 mindən çox vətəndaş kampaniyadan faydalana bilib.
“Kütləvi çıxarış” kampaniyası ilə yanaşı komitənin xüsusi nəqliyyat vasitələri ilə vətəndaşlara fərdi qaydada gündəlik mobil ofis xidmətləri göstərilir. Bu kampaniyalar çərçivəsində vətəndaşlara fərdi qaydada çıxarışların təqdim olunması, ilkin sənədlərin qəbulu həyata keçirilir. Ümumilikdə mobil ofislər vasitəsilə 220 minə yaxın vətəndaşa qeydiyyat xidmətləri göstərilib.
