İş yeri hesabatı
2017-ci il noyabrın 1-nə Azərbaycanda iqtisadi fəal əhalinin sayı 5 milyon 72,5 min nəfər olub, onların 4 milyon 821,6 min nəfərini məşğul əhali təşkil edib. Novator.az-ın məlumatına görə, Dövlət Statistika Komitəsi belə hesabat yayıb.
Rəsmi bilgiyə əsasən, oktyabrın 1-nə muzdla işləyənlərin sayı 1 milyon 526,4 min nəfər olub, iqtisadiyyatın dövlət sektorunda 877,6 min nəfər, qeyri-dövlət sektorunda 648,8 min nəfər çalışıb. Neft sektorunda 34,2 min nəfərin, qeyri-neft sektorunda 1 milyon 492,2 min nəfərin işlədiyi bildirilir.
Noyabrın 1-nə məşğulluq xidməti orqanları 36,9 min nəfərə rəsmi işsiz statusu verib. Onların 37,1 faizi qadınlardır. İşsizlik müavinətinin orta məbləği 270,2 manat olub.
Hesabata görə, regionların sosial-iqtisadi inkişafına istiqamətlənmiş üçüncü dövlət proqramının icrasını əhatə edən 1 yanvar 2014-cü ildən 1 oktyabr 2017-ci ilə qədər ümumilikdə 679,4 min olmaqla 502 min daimi iş yeri yaradılıb. 2017-ci ilin doqquz ayı ərzində ölkədə 239,7 min yeni, o cümlədən 150,9 min daimi iş yeri açılıb.
Yeni iş yerlərinin 60,3 faizi qeyri-dövlət sektorunun payına düşüb.
2017-ci ilin doqquz ayı ərzində ölkədə 33,9 min iş yeri bağlanıb.
