Güzəştli kredit rəqəmləri
İqtisadiyyat Nazirliyinin Sahibkarlığa Kömək Milli Fondu noyabrın 16-da Qazaxın Canalı kəndində işgüzar forum keçirib. Rəsmi məlumata görə, forumda çıxış edən fondun şöbə müdiri Samir Hümbətov deyib ki, bu il 1437 sahibkarlıq subyektinə 104 milyon manat güzəştli kredit verilib, bu investisiya layihələri 4300-dək yeni iş yerinin açılmasına imkan yaradır.
Forumda rayonda aqroparkın yaradılması ilə bağlı müzakirələr aparılıb. Hümbətov məlumat verib ki, hazırda 26 rayonda 40 aqroparkın yaradılması təşviq olunur: “Artıq Xaçmaz, Şəmkir və Cəlilabad rayonlarındakı aqroparklarda 1-ci mərhələ üzrə işlər başa çatdırılıb, 14 aqroparkın isə təşkili işlərinə başlanıb. Ümumi dəyəri 270 milyon manat olan 12 aqroparkın yaradılmasına 86,4 milyon manat güzəştli kredit verilib”.
Gəncə-Qazax iqtisadi rayonunda fəaliyyət göstərən sahibkarlıq subyektləri forum çərçivəsində 1,9 milyon manat güzəştli kredit alıb. Kreditlərin heyvandarlıq, tərəvəzçilik, otel tikintisi və s. sahələrin inkişafına yönəldiləcəyi, layihələrin reallaşdırılması nəticəsində 100-dək yeni iş yerinin açılmasının nəzərdə tutulduğu bildirilir.
Statistikaya görə, indiyədək Gəncə-Qazax iqtisadi rayonunda 6450-dən çox investisiya layihəsinin maliyyələşdirilməsinə 237,2 milyon manat güzəştli kredit ayrılıb.
