Elmira Süleymanovanın ombudsmanlığı: il ildən çox gəlir
İnsan hüquqları üzrə müvəkkil (ombudsman) Elmira Süleymanovanın səlahiyyət müddəti 9-cu aydır bitib.
Novator.az bildirir ki, “Azərbaycan Respublikasının insan hüquqları üzrə müvəkkili (ombudsman) haqqında” konstitusiya qanununa görə, müvəkkili prezidentin təqdimatı ilə Milli Məclis seçir.
Müvəkkilin səlahiyyət müddəti 7 ildir. Eyni şəxs müvəkkil vəzifəsinə iki dəfədən artıq seçilə bilməz.
Qanuna əsasən, müvəkkilin səlahiyyət müddəti bitdiyi gün yeni müvəkkil seçilmədikdə o, səlahiyyətlərinin icrasını davam etdirir, səlahiyyət müddəti yeni müvəkkilin seçildiyi gündən bitmiş hesab olunur.
Elmira Süleymanova ilk dəfə 2002-ci il iyulun 2-də ombudsman seçilib və postunda 7 il 8 aydan çox oturub, çünki ikinci seçki 2010-cu il martın 5-də olub.
Elmira Süleymanovanın ikinci 7 ili 2017-ci il martın 5-də bitib, amma üstündən 8 ay keçsə də, Milli Məclisə yeni təqdimat verilməyib.
Beləliklə, 2002-ci il iyulun 2-dən sayanda Elmira Süleymanova 15 il 4 aydan çoxdur ombudsman vəzifəsində çalışır.
Elmira Süleymanova 17 iyul 1937-ci ildə Bakı şəhərində anadan olub.
