Qəzetin adı prezidentin şərəfinə dəyişdi
Tacikistanın Şəhrinav şəhərində çıxan “Həqiqəti Şəhrinav” qəzetinin adı dəyişdirilərək “Fayzi Peşvo”(“Liderin faydası”) adlandırılıb.
Lider dedikdə prezident İmaməli Rəhman nəzərdə tutulur.
Novator.az-ın məlumatına görə, 1993-cü ildən çıxan, tirajı 3 minə yaxın qəzetin rəhbərliyi ad dəyişikliyi qərarını zamanın sifarişi adlandırıb. Baş redaktor Hikmətulla Səttari bildirib ki, əvvəlki ad 24 il əvvəl verilib və indiki dövrə uyğun gəlmir.
Redaksiya qəzetə yeni ad vermək üçün müsabiqə elan etdiyini, nəticədə “Fayzi Peşvo” adı seçildiyini bəyan edib.
Bu yenilik Tacikistanda 2016-cı ildən qeyd olunan Prezident Günü ilə üst-üstə düşüb. Prezident Günü İmaməli Rəhmanın 1994-cü il noyabrın 16-da ilk dəfə prezident andı içməsinin şərəfinə təsis olunub.
Tacikistan prezidenti İmaməli Rəhman 1992-ci ildən dövlət başçısı postunu tutur. O, sonuncu dəfə 2013-cü ilin noyabrında prezident seçilib. 2015-ci ildə ona millətin lideri statusu verilib.
Səidə Hüseynova
