Prezident Abşeron rayonuna baş çəkib
Prezident İlham Əliyev noyabrın 16-da Abşeron rayonuna baş çəkib. Xırdalan şəhərinin mərkəzində prezidenti qarşılayan Abşeron Rayon İcra Hakimiyyətinin başçısı İradə Gülməmmədova rayonda görülən abadlıq-quruculuq işləri və həyata keçirilən layihələr barədə danışıb.
Sonra İlham Əliyev Abşeron Olimpiya İdman Kompleksinin açılışında iştirak edib. AZƏRTAC xəbər verir ki, bu, ölkədə 42-ci olimpiya idman kompleksidir.
Komplekslə tanışlıqdan sonra prezident Abşeron rayon ictimaiyyətinin nümayəndələri və idmançılar ilə görüşüb.
Dövlət başçısı həmin gün “Zəhmət-Ruzi” MMC-nin fəaliyyəti ilə tanış olub. İqtisadiyyat naziri Şahin Mustafayev bildirib ki, “Zəhmət-Ruzi” MMC-nin dəyəri 42 milyon manat olan logistika mərkəzi, ət kəsimi, ət və süd emalı fabrikindən ibarət aqrar-sənaye kompleksinin ərsəyə gəlməsinə Sahibkarlığa Kömək Milli Fondunun xətti ilə 8,3 milyon manat güzəştli kredit ayrılıb. Götürülən kredit artıq tam qaytarılıb.
Prezident İlham Əliyev müəssisədə ət və süd məhsullarının istehsalı prosesi ilə tanış olub, hazır məhsullara baxıb.
İlham Əliyev Masazır qəsəbəsində yeni inşa olunan 5 nömrəli tam orta məktəbin açılışına da qatılıb. Yeni məktəb 1200 şagird yerlikdir, burada 41 sinif otağı var.
