Cocuq Mərcanlı: bərpanın yeni mərhələsi başa çatdı
Cəbrayıl rayonunun işğaldan azad edilmiş Cocuq Mərcanlı kəndində Qaçqınların və Məcburi Köçkünlərin İşləri üzrə Dövlət Komitəsinin apardığı tikinti-bərpa və abadlıq-quruculuq işlərinin növbəti mərhələsi başa çatıb.
Ermənistan silahlı birləşmələri Cocuq Mərcanlını 1993-cü ilin oktyabrında tutub. 1994-cü ilin yanvarında Azərbaycan Ordusu kəndi işğaldan azad edib. 2016-cı ilin aprel ayından ordu ətraf ərazilərə nəzarət edir və Cocuq Mərcanlı kəndində insanların təhlükəsiz yaşaması mümkün olub.
AZƏRTAC xəbər verir ki, yeni mərhələdə 100 fərdi yaşayış evinin, 50 yerlik uşaq bağçasının, inzibati bina, tibb məntəqəsi və klub-icma mərkəzi üçün binaların, poçt binasının və digər zəruri infrastruktur obyektlərinin tikintisi aparılıb.
17 hektar ərazidə inşa edilən evlərin 14-ü birotaqlı, 38-i ikiotaqlı, 36-sı üçotaqlı, 12-si dördotaqlıdır. Hər bir ailə üçün 0,10 hektar torpaq sahəsi ayrılıb.
Qəsəbədaxili yollara asfalt örtük salınıb, elektrik, su və qaz xətlərinin çəkilişi başa çatıb.
Noyabrın 16-da baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov qəsəbəyə baş çəkib, görülən işlərlə maraqlanıb. Jurnalistlərə danışan Əli Həsənov bildirib ki, yeni evlər öz sahiblərini gözləyir: “Cocuq Mərcanlı sakinlərindən qəsəbəyə köçürülmək üçün komitəyə 300-ə qədər ərizə və müraciət daxil olub. Birinci mərhələdə bura 50 ailə köçürülüb. Seçim zamanı kim torpaqda işləyə biləcəksə, ona üstünlük verilir. Növbəti 100 ev üçün də seçim belə olacaq”.
