Baş Prokurorluq bir neçə vəkillə bağlı məsələ qaldırıb
Baş Prokurorluq vəkillər Nemət Kərimli, Əsabəli Mustafayev, Fəxrəddin Mehdiyev və Aqil Layıcov barəsində tədbir görülməsi üçün Vəkillər Kollegiyasına təqdimat göndərib.
Məlumatı Nemət Kərimli yayıb.
“Azadlıq” radiosuna açıqlamasında Nemət Kərimli bildirib ki, ona aid təqdimatla əlaqədar noyabrın 16-da Vəkillər Kollegiyasının İntizam Komissiyasında olub.
Vəkilin dediyinə görə, təqdimatda o, ictimaiyyəti çaşdıran məlumatlar yaymaqda günahlandırılıb.
Təqdimat hazırda həbsdə olan jurnalist Əfqan Muxtarlıya qarşı aparılan və əvvəllər həbsdə olmuş müxalif siyasətçi Tofiq Yaqubluya qarşı aparılmış cinayət işləri ilə bağlıdır. Nemət Kərimli Əfqan Muxtarlının vəkilidir. Vaxtilə o, Tofiq Yaqublunun da vəkili olub.
Baş Prokurorluğun təqdimatında yazılıb ki, Nemət Kərimli müdafiə etdiyi şəxslərin işləri ilə bağlı sosial şəbəkələrdə ictimaiyyəti çaşdıran məlumatlar yayıb. Nemət Kərimli isə iddia edir ki, təqdimata bunu sübuta yetirən hər hansı fakt və ya məlumat əlavə olunmayıb: “Ona görə də İntizam Komissiyasına qısa izahat verdim və bildirdim ki, sübut təqdim olunmadığı üçün bu məsələyə münasibət bildirməyi artıq hesab edirəm”.
