Tələbəni əsgər aparan qanun qəbul olundu
Ermənistan parlamenti noyabrın 15-də “Hərbi xidmət və hərbi qulluqçunun statusu haqqında” qanun layihəsini yekun oxunuşda qəbul edib. Novator.az xəbər verir ki, qanun təhsilə görə hərbi xidmətdən möhlətin ləğvini nəzərdə tutur. Hərbi xidmətdən möhlət yalnız Müdafiə Nazirliyi ilə mülki müqavilə bağlayan şəxslərə veriləcək. Belə müqavilə bağlayan şəxslər ali təhsilin bakalavr pilləsini başa vurduqdan sonra 3 il hərbi xidmət keçməlidir. Adi hərbi xidmət 2 ildir.
Bir müddətdir erməni tələbələr hərbi xidmətdən möhlət hüququnun ləğvini etirazla qarşılayır, aksiyalar keçirirlər. Noyabrın 15-də etirazçı tələbələrin nümayəndələri parlamentə dəvət olunub. Danışıqlarda noyabrın 22-də problemlə bağlı geniş dəyirmi masanın təşkili razılaşdırılıb. Buna görə də tələbələrin tətili və aclıq aksiyası dayandırılıb.
Azərbaycanın “Hərbi vəzifə və hərbi xidmət haqqında” qanununa əsasən, bakalavriat, magistratura və doktorantura səviyyələrində təhsil alanların hərbi xidmətə çağırışdan möhlət hüququ var. Xarici ölkələrdə oxuyan bakalavr, magistr və doktorantlara, rezidentura (internatura) təhsili alanlara, o cümlədən Azərbaycan prezidentinin müəyyən etdiyi elmi təşkilatda təhsil alan şəxslərə də möhlət hüququ verilir.
