REAL daha bir neçə ünvana üz tutub
Respublikaçı Alternativ Hərəkatının bazasında yaradılan eyniadlı partiyanın təşəbbüs qrupu təsis qurultayı keçirmək üçün yenidən bir sıra ünvanlara müraciət edib.
Təşəbbüs qrupu qurultayı oktyabrın 29-na təyin etmiş, ancaq yer ayrılmaması ucbatından tədbiri keçirə bilməmişdi.
Noyabrın əvvəllərində qrup Bakı Şəhər İcra Hakimiyyətinə yenidən müraciət edərək meriyanın balansında olan, 400 nəfər üçün münasib hər hansı bir qapalı məkanın ayrılmasını istəmişdi. Həmin müraciətdə qurultay üçün 18-19 noyabr, 25-26 noyabr və 2-3 dekabr tarixlərində, səhər saat 8-dən axşam 7-yə qədər olan vaxtda yer ayrılması xahiş edilmişdi.
Noyabrın 14-də REAL Hərəkatının mətbuat xidmətinin yaydığı məlumatda deyilir ki, son müraciət təsis qurultayının keçirilməsinə yer ayrılması və kirayələnməsi üçün müxtəlif qurumlara – Bakı Şəhər İcra Hakimiyyətinə, Azərbaycan Dövlət Opera və Balet Teatrına, Beynəlxalq Mətbuat Mərkəzinə, “Pullman Baku”, “Park İnn”, “Hyatt Regency” və “The Landmark Baku” otellərinə ünvanlanıb.
Təşəbbüs qrupu qurultayın paytaxtın Əmircan qəsəbəsində yerləşən Səttar Bəhlulzadə adına mədəniyyət sarayında da keçirilməsini mümkün sayır. Ancaq noyabrın 14-də yayılan məlumatda qeyd edilir ki, mədəniyyət sarayının qurultaya ayrılması üçün Bakı Şəhər Mədəniyyət və Turizm Baş İdarəsinə edilmiş müraciətə indiyədək heç bir cavab verilməyib.
REAL Hərəkatı 2008-ci ildə yaradılıb. Qurumun lideri İlqar Məmmədov 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 7 il azadlıqdan məhrumetmə cəzası alıb.
