Elçin İsmayıllının şikayətinə baxılır
Noyabrın 14-də Şəki Apellyasiya Məhkəməsində “Azadlıq” qəzetinin bölgə müxbiri, AXCP Ali Məclisinin üzvü Elçin İsmayıllı barəsində çıxarılmış hökmdən şikayətə baxılıb.
Elçin İsmayıllı fevralın 17-dən həbsdədir. O, İsmayıllı rayonunda tutulub. Sentyabrın 18-də Şəki Ağır Cinayətlər Məhkəməsi onu Cinayət Məcəlləsinin 182-ci (hədə-qorxu ilə tələb etmə) və 308-ci (vəzifə səlahiyyətlərindən sui-istifadə) maddələri ilə təqsirli bilərək 9 il müddətinə azadlıqdan məhrum edib.
Azadliq.info-nun xəbərinə görə, apellyasiya instansiyasında Elçin İsmayıllını vəkillər Elçin Sadıqov və İslam İsmayılov müdafiə edirlər.
Noyabrın 14-ü hakim Elçin Hüseynovun sədrliyi ilə keçirilən prosesdə dövlət ittihamçısı çıxış edib. Elçin İsmayıllı bütün ittihamları rədd edib və təqsirsiz olduğunu bildirib. Bundan sonra vəkil İslam İsmayılov jurnalistdən şikayətçi olanların Şəki Apellyasiya Məhkəməsinə çağrılaraq dinlənməsi tələbi ilə vəsatət qaldırıb. Vəsatət təmin olunub və növbəti məhkəmə iclası dekabrın 5-nə təyin edilib.
