“Turan” vergi sanksiyasından qurtuldu
“Turan” informasiya agentliyi təsərrüfat-maliyyə fəaliyyətini bərpa edərək noyabrın 10-da Vergilər Nazirliyinə bu haqda bilgi göndərib. Vergi ödəməkdən yayınma işi üzrə araşdırmalar zəminində “Turan”ın fəaliyyəti məhdudlaşmışdı.
Son məlumata görə, Vergilər Nazirliyi agentliyin vergidən yayınması haqda qərarı ləğv edib, həmçinin 16 avqust 2017-ci il yoxlamasının nəticələrini etibarsız sayıb. Nazirlik “Turan”a 38 min manatdan çox vergi borcu hesablamışdı.
Novator.az xatırladır ki, avqustun 7-də Vergilər Nazirliyinin Vergi Cinayətlərinin İbtidai Araşdırılması Departamenti “Turan”a qarşı cinayət işinə başlayıb. Avqustun 16-da bununla əlaqədar agentliyin ofisində axtarış aparılıb, mühasibat sənədləri və maliyyə fəaliyyəti ilə bağlı elektron daşıyıcılar götürülüb.
Avqustun 24-də agentliyin direktoru Mehman Əliyev nazirliyin “Turan”dakı yoxlamaları zəminində tutulub, Yasamal Rayon Məhkəməsi onu qanunsuz sahibkarlıq, vergidən yayınma və vəzifə səlahiyyətlərindən sui-istifadə ittihamları ilə təqsirləndirilən şəxs qismində 3 aylıq həbs edib.
Sentyabrın 11-də Yasamal məhkəməsi Mehman Əliyev barəsində həbs qətimkan tədbirini başqa yerə getməmək haqqında iltizam qətimkan tədbiri ilə əvəz etdiyinə görə direktor azadlığa buraxılıb.
Oktyabrın 30-da Vergi Cinayətlərinin İbtidai Araşdırılması Departamenti “Turan”a qarşı cinayət işinə xitam verib, Mehman Əliyevin ölkədən çıxışına qoyulan qadağa götürülüb.
