İranda zəlzələ: yüzlərlə adam ölüb, on minlərlə ev dağılıb
Noyabrın 12-si axşam saat 10 radələrində İran-İraq sərhədində güclü zəlzələ baş verib. Novator.az-ın məlumatına görə, episentri İraq ərazisinə düşən zəlzələdə ən çox İranın Kirmanşah vilayəti ziyan çəkib. Vilayətdə 350-dən çox adamın öldüyü, 6000-ə yaxın adamın xəsarət aldığı bildirilir.
Gücü 7 balı ötən zəlzələdə 70 minə yaxın iranlının evsiz qaldığı xəbər verilir.
İraqda 8 nəfərin həlak olduğu açıqlanıb.
Prezident İlham Əliyev iranlı həmkarı Həsən Ruhaniyə başsağlığı teleqramı göndərib. Teleqramda deyilir: “Hörmətli cənab prezident, ölkənizin qərbində baş vermiş güclü zəlzələ nəticəsində çoxsaylı insan tələfatı və dağıntılar barədə xəbər məni olduqca kədərləndirdi. Bu faciə ilə əlaqədar Sizə, həlak olanların ailələrinə və yaxınlarına, bütün İran xalqına öz adımdan və Azərbaycan xalqı adından dərin hüznlə başsağlığı verir, yaralananlara və xəsarət alanlara şəfa diləyir, təbii fəlakətin nəticələrinin tezliklə aradan qaldırılmasını arzulayıram. Allah rəhmət eləsin!”
