İran saytı Qarabağa səfəri təbliğ edir
İranın İslami İrşad və Mədəniyyət Nazirliyinin rəsmi lisenziyası ilə fəaliyyət göstərən Poolnews.ir xəbər agentliyi əhalini işğal altında olan Azərbaycan ərazilərinə səfərə təşviq edir. Xəbəri noyabrın 13-də Gunaz.tv yayıb.
Məlumata görə, Poolnews.ir saytının “Qarabağa səfər üçün bələdçilik” başlığı ilə yaydığı yazıda Dağlıq Qarabağda erməni mədəniyyətinin hakim olduğu vurğulanır, ərazi müstəqil məntəqə adlandırılır. Həmçinin Dağlıq Qarabağın Azərbaycan, İran və Ermənistanla qonşu olduğu qeyd edilir.
Yazıda əlavə olunur ki, Azərbaycan və Ermənistan bu bölgədə 1988-ci ildən 1994-cü ilədək müharibə edib, bir-birinə qarşı etnik təmizləmə aparmağa çalışıb.
“Qarabağa səfər üçün bələdçilik”də yazılır: “Diqqət etmək lazımdır ki, Dağlıq Qarabağa görə Azərbaycanla Ermənistan arasında ixtilaf var. Ona görə də pasportunda bu məntəqənin vizası və ya giriş-çıxış möhürü olan turistlər Azərbaycan Respublikasına buraxılmır. Lakin özünü ölkə kimi elan edən Qarabağ rəhbərliyi bu məsələdən xəbərdardır. Pasport sahibi razılıq verərsə, ona viza və ya möhür vurulur. Əgər siz “Pasportunuza viza və ya möhür vurulmasını istəyirsinizmi” sualına “xeyr” desəniz, o zaman sizə vizanı əvəz edən bir vərəqə veriləcək”.
Novator.az xatırladır ki, 1988-ci ildən Ermənistan Dağlıq Qarabağ bölgəsini Azərbaycandan qoparmaq üçün təcavüzə başlayıb. 1991-ci ildə erməni separatçılar Dağlıq Qarabağı “müstəqil dövlət” elan edib. Bunun ardınca alovlanan işğalçı müharibədə Dağlıq Qarabağ və onun ətrafındakı 7 rayon Ermənistanın nəzarətinə keçib. 1994-cü ildə elan olunan atəşkəsdən bəri ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir.
