Müdafiə naziri Brüsseldə nəyə söz verib?
Azərbaycanın müdafiə naziri general-polkovnik Zakir Həsənov noyabrın 9-u Brüsseldə NATO-nun Əfqanıstandakı Qətiyyətli Dəstək Missiyasına töhfə verən dövlətlərin sammitinə qatılıb. Toplantıda Əfqanıstandakı təhlükəsizlik vəziyyəti, yerli müdafiə qüvvələrinin inkişafı, Qətiyyətli Dəstək Missiyasının gələcəyi barədə müzakirələr aparılıb.
Mod.gov.az-ın məlumatına görə, iclasda çıxış edən Zakir Həsənov Azərbaycanın Əfqanıstandakı beynəlxalq sülhməramlı əməliyyatların dəstəklənməsi missiyasına verdiyi töhfədən söz açıb, Əfqanıstana yardım məqsədilə təlim, təhsil, infrastruktur, nəqliyyat, investisiya proqramlarının həyata keçirildiyini vurğulayıb. Müdafiə naziri Azərbaycanın 2017-ci ildən sonra da Əfqanıstanın müdafiə və təhlükəsizliyinə yardım edəcəyini deyib.
Oktyabrın 30-da açılan Bakı-Tbilisi-Qars dəmir yolunun böyük geosiyasi məkanda tarixi əhəmiyyətini xüsusi qeyd edən müdafiə naziri layihənin Avropa və Asiyanın nəqliyyat xəritəsinin önəmli hissəsinə çevrildiyini, o cümlədən Qətiyyətli Dəstək Missiyasının ehtiyaclarının yerinə yetirilməsi üçün imkanlar yaratdığını diqqətə çatdırıb.
