Finişin yolu açıldı
Dünya futbol çempionatının final raunduna son 9 vəsiqə uğrunda mübarizə start götürüb. Novator.az-ın məlumatına görə, 4 vəsiqəsi vakant olan Avropada noyabrın 9-u iki oyun keçirilib. Xorvatiya – Yunanıstan matçında ev sahibi 4:1 hesabı ilə üstün gəlib. Şimali İrlandiya isə evdə İsveçrəyə uduzub – 0:1.
İsveç – İtaliya görüşü bu gün, Danimarka – İrlandiya görüşü sabah baş tutacaq.
Novator.az-ın məlumatına görə, Afrikada qrup turnirinə 10-14 noyabr matçları ilə yekun vurulacaq. Bu zonadan 3 vakant vəsiqə var.
Digər 2 vəsiqənin taleyinə müxtəlif zonaların mübarizəsində aydınlıq gələcək. Bu gün Şimali və Mərkəzi Amerikadan Honduras Asiya təmsilçisi Avstraliyanı, noyabrın 11-də Okeaniya təmsilçisi Yeni Zelandiya Cənubi Amerikadan Perunu qəbul edir.
2018-ci ildə keçiriləcək çempionata ev sahibi Rusiya, Avropadan Almaniya, İngiltərə, Belçika, İspaniya, Polşa, Serbiya, İslandiya, Fransa, Portuqaliya, Afrikadan Nigeriya, Misir, Şimali və Mərkəzi Amerikadan Meksika, Kosta Rika, Panama, Cənubi Amerikadan Braziliya, Uruqvay, Kolumbiya, Argentina, Asiyadan Cənubi Koreya, Yaponiya, Səudiyyə Ərəbistanı, İran vəsiqə alıb.
