“Avroviziya”nın Ayseli
2018-ci il mayın 8-12-də Portuqaliyanın paytaxtı Lissabonda “Avroviziya” mahnı müsabiqəsi keçiriləcək. Azərbaycanı bu beynəlxalq mahnı yarışında müğənni Aysel Məmmədova təmsil edəcək. Qərarı münsiflər heyəti bu həftə çıxarıb.
Aysel Məmmədova 1989-cu ildə Bakı şəhərində anadan olub. 2006-cı ildə Bülbül adına Orta İxtisas Musiqi Məktəbini, 2010-cu ildə Üzeyir Hacıbəyli adına Bakı Musiqi Akademiyasını bitirib. Xarici musiqiçilərdən özəl dərslər alıb, müxtəlif beynəlxalq caz festivallarında iştirak edib. Pianoçu, vokalist və bəstəkardır.
Novator.az bildirir ki, Azərbaycan Avropa Yayım Birliyinin 1956-cı ildən keçirdiyi “Avroviziya” musiqi yarışına 2008-ci ildən qatılır. 2008-ci ildə Elnur Hüseynov və Samir Cavadzadə 8-ci yerdə, 2009-cu ildə Aysel Teymurzadə və Araş 3-cü yerdə, 2010-cu ildə Səfurə Əlizadə 5-ci yerdə, 2011-ci ildə Nigar Camal və Eldar Qasımov 1-ci yerdə, 2012-ci ildə Səbinə Babayeva 4-cü yerdə, 2013-cü ildə Fərid Məmmədov 2-ci yerdə qərarlaşıb.
2014-cü ildə təmsilçi Dilarə Kazımova 22-ci yeri, 2015-ci ildə Elnur Hüseynov 12-ci yeri, 2016-cı ildə Səmra Rəhimli 17-ci yeri, 2017-ci ildə Diana Hacıyeva 14-cü yeri tutub.
