Büdcə müzakirələri
Noyabrın 8-i Milli Məclisin beynəlxalq münasibətlər və parlamentlərarası əlaqələr; əmək və sosial siyasət; elm və təhsil; səhiyyə; ailə, qadın və uşaq məsələləri komitələrinin birgə iclasında büdcə zərfinə daxil olan qanun layihələri müzakirə olunub. Xəbəri AZƏRTAC yayıb.
İclasda çıxış edən əmək və sosial siyasət komitəsinin sədri Hadi Rəcəbli deyib ki, gələn ilin icmal büdcəsində sosial müdafiə xərcləri bu illə müqayisədə 20 faiz çoxdur: “Dövlət büdcəsində xərclərin 33,5 faizi sosial müdafiə tədbirlərinə yönəldilib. Bu göstərici əvvəlki illərdə 26-28 faiz civarında olub”.
Maliyyə nazirinin müavini Azər Bayramov bildirib ki, 2018-ci ilin dövlət büdcəsinin gəlirləri 20,127 milyard manat proqnozlaşdırılır, bu, 2017-ci ilin təsdiq olunmuş proqnozu ilə müqayisədə 3,361 milyard manat çoxdur.
İclasda Hesablama Palatasının rəyi dinlənib.
Əmək və əhalinin sosial müdafiəsi naziri Səlim Müslümov qeyd edib ki, gələn ilin büdcəsində sosial müdafiə və sosial təminat xərcləri üçün 2,2 milyard manat vəsait ayrılması nəzərdə tutulub, bu məbləğin 1,3 milyard manatı Dövlət Sosial Müdafiə Fondunun büdcəsinin balanslaşdırılması məqsədilə dövlət büdcəsinin öhdəliklərinin maliyyələşdirilməsinə yönəldiləcək.
Novator.az bildirir ki, 2018-ci ilin dövlət büdcəsi layihəsində tikintiyə 4 milyard 927,5 milyon manat; dövlət borcuna və öhdəliklərə xidmətə 2 milyard 262,7 milyon manat; təhsilə 2 milyard manat; müdafiə qüvvələrinə 1 milyard 366,3 milyon manat; məhkəmə hakimiyyəti, hüquq mühafizə və prokurorluğa 1 milyard 329,5 milyon manat; səhiyyəyə 740,7 milyon manat; qanunvericilik və icra hakimiyyəti orqanlarının saxlanmasına 654,9 milyon manat; kənd təsərrüfatına 616,6 milyon manat; mənzil və kommunal təsərrüfatına 457,4 milyon manat; nəqliyyat və rabitəyə 166,8 milyon manat; elmə 128 milyon manat; mədəniyyət və incəsənət sahəsində fəaliyyətə 127,8 milyon manat ayırmaq nəzərdə tutulur.
