Gürcüstanın iqtisadiyyatı 4,7% artıb
Gürcüstanın Milli Statistika Xidməti ölkənin sosial-iqtisadi göstəricilərini yayıb. Novator.az bildirir ki, hesabata görə, 2017-ci ilin ikinci rübündə ümumi daxili məhsul (ÜDM) ötən ilin müvafiq dövrü ilə müqayisədə 4,7% artıb.
2017-ci ilin aprel-iyun aylarında 3,7 milyard dollardan çox ÜDM istehsalı qeydə alınıb. Həmin müddət ərzində tikintidə 16,4%, mehmanxana və restoran biznesində 12,9%, dağ-mədən sənayesində 7,4%, daşınmaz əmlakla bağlı əməliyyatlarda 7,2%, maliyyə sahəsində 6,4%, rabitə sahəsində 4,8% artım, kənd təsərrüfatında 2,4% azalma olub.
2017-ci ilin ikinci rübündə Gürcüstanın ÜDM-ində ən böyük pay sənayeyə aiddir: 16,7%. Ticarət sahəsi 15,2%-lə ikinci, kənd təsərrüfatı və balıqçılıq 9,9%-lə üçüncü yerdədir.
Novator.az xatırladır ki, 2017-ci ilin yanvar-sentyabr aylarında Azərbaycanda əvvəlki ilin müvafiq dövrünə nisbətən 0,6 faiz az ümumi daxili məhsul istehsal edilib. 9 ayda iqtisadiyyatın qeyri-neft sektorunda istehsal olunmuş əlavə dəyər 2,5 faiz artıb, neft sektorunda 6,5 faiz azalıb.
