Büdcə layihəsi parlament komitələrində təqdim olunub
Noyabrın 7-də Milli Məclisin iqtisadi siyasət, sənaye və sahibkarlıq; müdafiə, təhlükəsizlik və korrupsiya ilə mübarizə; təbii ehtiyatlar, energetika və ekologiya; aqrar siyasət; ictimai birliklər və dini qurumlar komitələrinin birgə iclası keçirilib. İclasda 2018-ci ilin dövlət büdcəsi layihəsi müzakirə olunub.
Maliyyə naziri Samir Şərifov qanun layihəsini təqdim edərək bildirib ki, 2018-ci ilin dövlət büdcəsinin gəlirləri 20,127 milyard manat proqnozlaşdırılır: “Bu, 2017-ci ilin təsdiq olunmuş proqnozu ilə müqayisədə 3,361 milyard manat və ya 20 faiz çoxdur”.
AZƏRTAC-ın məlumatına görə, Samir Şərifov qeyd edib ki, gələn il dövlət büdcəsinin gəlirləri üzrə proqnozun 7,907 milyard manatı və ya 39,3 faizi Vergilər Nazirliyinin xətti ilə daxilolmaların, 9,216 milyard manatı və ya 45,8 faizi Dövlət Neft Fondundan transfertin, 2,43 milyard manatı və ya 12,1 faizi Dövlət Gömrük Komitəsinin xətti ilə daxilolmaların, 574 milyon manatı və ya 2,8 faizi isə digər gəlirlərin payına düşür.
Dövlət büdcəsində neftin baza qiyməti bir barrel üçün 45 dollar götürüləcək. Bu, 2017-ci ildəki analoji baza qiymətindən 5 dollar yuxarıdır.
Nazir əlavə edib ki, gələn il dövlət borcuna xidmətlə bağlı 2 milyard 263 milyon manat vəsait nəzərdə tutulur, bu da 2017-ci illə müqayisədə 37,8 faiz çoxdur.
İqtisadiyyat nazirinin müavini Sevinc Həsənova iclasda deyib ki, 2018-ci ildə tədiyyə balansı üzrə müsbət saldonun 1,4 milyard dollar olacağı gözlənir: “Qeyri-neft sektorunda 2,9 faiz artım proqnozlaşdırılır”.
Nazir müavini 2018-ci ildə ümumi daxili məhsulun 1,5 faiz artımının nəzərdə tutulduğunu vurğulayıb.
