Nazirlik müraciət hesabatı yayıb
Təhsil Nazirliyinin telefon məlumat mərkəzinə (“Qaynar xətt” xidməti: 146) daxil olan zənglərin və vətəndaşların qəbulu mərkəzində vətəndaşlara göstərilən xidmətlərin statistikası açıqlanıb.
Rəsmi hesabata görə, 2017-ci ilin oktyabr ayında ümumilikdə 15767 müraciət daxil olub. Telefon məlumat mərkəzində 11218 zəng qəbul edilib, vətəndaşların qəbulu mərkəzində 4549 vətəndaş xidmət alıb.
Nazirlik 1920 sənəd (950 məktub, 660 ərizə, 310 digər sənəd) qəbul edib.
Müraciətlər daha çox ali təhsil sənədlərinin (diplomların) tanınması, müəllimlərin işə qəbulu, dərs saatlarının verilməsi, şagirdlərin bir məktəbdən digərinə köçürülməsi ilə bağlı məsələləri əhatə edib.
