Gənclər karyerada ilk addım atdılar
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti Odlar Yurdu Universitetində “Karyerada ilk addım” devizli aktiv məşğulluq tədbiri keçirib. Noyabrın 6-da yayılan rəsmi məlumata görə, tədbirdə bildirilib ki, bu ilin 9 ayında Dövlət Məşğulluq Xidmətinin münasib işlərlə təmin etdiyi 41,6 min nəfərin 32,7 faizi (13615 nəfər) gənclər olub. Nazirliyin xətti ilə peşə hazırlığı və əlavə təhsil kurslarına cəlb olunan 2913 nəfərdən 57,2 faizi (1666 nəfər) də gənclərdir.
Qeyd olunub ki, “Karyerada ilk addım” tədbirləri bu il 9 ali təhsil müəssisəsini əhatə edib. Həmin tədbirlər zamanı ümumilikdə 2,6 min vakant iş yeri təklif olunub.
Odlar Yurdu Universitetində keçirilən aktiv məşğulluq tədbirində 50-si özəl, 4-ü dövlət sektoruna aid 54 müəssisə 267 boş (vakant) iş yeri təqdim edib. Vakant iş yerlərinin 49-u dövlət, qalan 218-i isə özəl müəssisələrə aid olub.
Tədbirdə tələbə və məzunlara əmək bazarındakı mövcud vəziyyət, peşə və ixtisaslara olan tələbat barədə məlumatlar verilib, onlara işəgötürənlərlə ilkin əlaqələr quraraq öz şəxsi məlumatlarını (CV) təqdim etmələrinə şərait yaradılıb. İştirakçılara seçdikləri vakant iş yerlərinə göndərişlər verilib.
