Qurban Qurbanov milli komandaya baş məşqçi təyin olundu
Noyabrın 3-ü Bakı Olimpiya Stadionunda AFFA İcraiyyə Komitəsinin iclası keçirilib. Novator.az-ın məlumatına görə, iclasın qərarı ilə Qurban Qurbanov Azərbaycan milli futbol komandasının baş məşqçisi vəzifəsinə təyin olunub. O, “Qarabağ”ın baş məşqçisi postunda da qalacaq.
Novator.az bildirir ki, Qurban Qurbanov 13 aprel 1972-ci ildə Zaqatalanın Aşağı Tala kəndində doğulub. Futbolçu karyerası ərzində Azərbaycanın “Daşqın”, “Turan”, “Kür-Nur”, “Neftçi”, “İnter”, Gürcüstanın “Mertsxali”, “Alazani”, Rusiyanın “Dinamo” (Stavropol), “Fakel”, “Baltika”, “Volqar” klublarında hücumçu mövqeyində çıxış edib. Azərbaycan milli komandasının heyətində 67 oyun keçirib və 14 qol vurub.
2006-cı ildə futbolçu karyerasını başa vuran Qurban Qurbanov əvvəl Bakının “İnter” klubunun idman direktoru vəzifəsində çalışıb, sonra “Neftçi”də baş məşqçi və idman direktoru vəzifələrini tutub. 2008-ci ildən “Qarabağ”ın baş məşqçisidir.
“Qarabağ” onun dövründə 4 dəfə Azərbaycan çempionu olub, 4 dəfə Azərbaycan kubokunu qazanıb, 3 dəfə Avropa Liqasının, 1 dəfə Çempionlar Liqasının qrup mərhələsinə düşüb.
