Qanunlardan üstün qanun rəsmiləşdi
Yeni neft sazişinin ratifikasiyası haqqında qanun Azərbaycan prezidentinin imzası ilə rəsmiləşib.
Novator.az xatırladır ki, sentyabrın 14-də Azərbaycan hökumətinin, SOCAR-ın, BP, “Chevron”, “İnpex”, “Statoil”, “ExxonMobil”, “TP”, “İtochu” və “ONGC Videsh” şirkətlərinin rəsmiləri Bakıda Xəzər dənizinin Azərbaycan sektorunda Azəri, Çıraq yataqlarının və Günəşli yatağının dərinlikdə yerləşən hissəsinin birgə işlənməsi və neft hasilatının pay bölgüsü haqqında düzəliş edilmiş və yenidən tərtib olunmuş saziş imzalayıblar.
Oktyabrın 31-də Milli Məclisin ratifikasiya etdiyi saziş Azəri-Çıraq-Günəşlinin (AÇQ) işlənməsini 2050-ci ilə qədər uzadır. Sənədə əsasən, tərəfdaşların yeni iştirak payları bu nisbətdədir: BP – 30,37 faiz, “AzACG” (SOCAR) – 25 faiz, “Chevron”- 9,57 faiz, “İnpex” – 9,31 faiz, “Statoil” – 7,27 faiz, “ExxonMobil” – 6,79 faiz, “TP” – 5,73 faiz, “İtochu” – 3,65 faiz və “ONGC Videsh Limited” (OVL) – 2,31 faiz.
Prezident İlham Əliyevin imzaladığı qanuna görə, saziş qüvvədə olduğu müddət ərzində ona uyğun gəlməyən və ya zidd olan hər hansı başqa mövcud və ya qəbul oluna biləcək qanunların, fərmanların, yaxud inzibati sərəncamların müddəalarından üstün tutulur. Sənədə hər hansı əlavələr, düzəlişlər, dəyişikliklər yalnız tərəflərin yazılı razılığı ilə edilə bilər.
