Müsavat paytaxtda piket keçirdi
Müsavat Partiyası noyabrın 3-ü Bakı Şəhər İcra Hakimiyyətinin binası qarşısında sanksiyalaşdırılmamış piket keçirib.
Novator.az xəbər verir ki, piketdə meriyanın partiyaya oktyabrın 21-də yürüş keçirməyə razılıq verməməsinə etiraz bildirilib. Şüarlar səsləndirilib, piketin qətnaməsi oxunub. Müsavat başqanının müavinləri Səxavət Soltanlı və Tofiq Yaqublu toplaşanlar qarşısında çıxış ediblər.
Polis aksiyanın 9 iştirakçısını (Səxavət Soltanlı, Tofiq Yaqublu, Elman Fəttah, Müstafa Hacıbəyli, Əbulfəz Sadıqbəyli, Rəhim Yaqublu, Əziz Məmiyev, Zeynal Zeynalov, Vidadi Zamanov) saxlayıb.
Müsavat oktyabrın 21-də “Azadlıq prospekti” stansiyasının çıxışından “Dərnəgül” stansiyasının qarşısındakı meydanadək və ya 20 saylı məktəbin yaxınlığındakı meydandan Hüseyn Cavid bağındakı meydanadək olan marşrutların birində yürüş keçirmək istəyib. Ancaq Bakı Şəhər İcra Hakimiyyəti yürüşə razılıq verməyib və Müsavata oktyabrın 21-də Yasamal rayonundakı İdman-Sağlamlıq Kompleksinin stadionunda mitinq keçirməyi təklif edib.
İcra hakimiyyəti yürüşə razılıq verməməsini aksiyanın nəqliyyat və piyadaların hərəkətinə mane olacağı ehtimalı ilə izah edib. Müsavat isə bunu bəhanə və yürüşlərin faktiki qadağan olunması, qanunların, konstitusiya müddəalarının pozulması kimi qiymətləndirib və etiraz əlaməti olaraq piket keçirməyi qərara alıb.
Ancaq Müsavat Partiyasının Bakı Şəhər İcra Hakimiyyətinin binası qarşısında piket keçirmək istəyinə də mənfi cavab verilib.
