“Azərbaycanda 10 jurnalistdən 9-na hücum cəzasız qalır”
ABŞ Dövlət Departamentinin sözçüsü Hizer Noyert Jurnalistlərə Qarşı Cəzasızlığa Son Qoymaq Uğrunda Beynəlxalq Gün münasibətilə bəyanat yayıb.
Bəyanatında o, dünyada jurnalistlərin insanların həyatına mənfi təsir göstərən hadisələri işıqlandırmaq naminə riskə getdiyini vurğulayıb.
Hizer Noyert deyib ki, jurnalistlər səlahiyyətdən sui-istifadə, korrupsiya hallarına işıq salır, transmilli kriminal qruplaşmalardan qaynaqlanan təhlükələri ifşa edir, dezinformasiyaların, saxta təbliğatın qarşısını alırlar.
“Amerikanın səsi” xəbər verir ki, ölkələrdən nümunə gətirərkən Hizer Noyert Azərbaycan, Rusiya, Türkiyə, İraq və Suriyanın adını çəkib. Azərbaycandan danışarkən deyib: “Azərbaycanda 10 jurnalistdən 9-na edilən fiziki hücum cəzasız qalır”.
Dövlət Departamentinin sözçüsü hesab edir ki, Rusiyada jurnalistləri qətlə yetirənlərin cavabdehlik daşıması məsələsində irəliləyiş yoxdur, Türkiyədə isə jurnalistlərə, müstəqil media qurumlarına hücum çəkənlər yüngül cəza alırlar.
Hizer Noyert vurğulayıb ki, beynəlxalq ictimaiyyət jurnalistlərə qarşı cinayətlərin cəzasız qalmasına son qoymaq üçün birgə hərəkət etməlidir.
Dövlət Departamentinin sözçüsü ABŞ-ın “xaricdə azad, peşəkar müstəqil mətbuata sədaqətini yenilədiyini” qeyd edib.
