Separatçılar məhkəmədən yayınır
Kataloniya separatçılarının lideri, oktyabrın 30-dan Belçikanın paytaxtı Brüsselə sığınan Karles Puçdemont Madriddə yerləşən Milli Məhkəmə Palatasının çağırışına əməl etməyib.
Prokurorluq Karles Puçdemonta, eləcə də onun hökumətində yer almış bəzi şəxslərə üsyan və qiyam təşkili, dövlət vəsaitini mənimsəmə ittihamları irəli sürüb. Həmin şəxslər ifadə vermək üçün noyabrın 2-si və 3-ü üçün Milli Məhkəmə Palatasına dəvət olunublar.
Novator.az-ın məlumatına görə, noyabrın 2-də Kataloniyanın keçmiş hökumətinin 9 üzvü, o cümlədən Karles Puçdemontun müavini olmuş Oriol Junkeras palataya gəliblər. Karles Puçdemont və onun 4 nəfər müşaviri dəvətə baxmayaraq Brüsseldə qalıblar.
Prokurorluğun Milli Məhkəmə Palatasına müraciətində ifadə verməyə gəlməyənlərin tutulması xahişi yer alır.
Kataloniyanın buraxılmış hökumətinin adından yayılmış bəyanatda Karles Puçdemontun və onunla Brüsseldə olan şəxslərin ifadə verməyə gəlməyəcəyi açıqlanıb.
Muxtar Kataloniya vilayətində oktyabrın 1-də keçirilmiş qanunsuz referenduma qatılanların 90 faizindən çoxu bölgənin müstəqil dövlət elan olunmasına tərəfdar çıxıb. Bu nəticələri əsas tutan Kataloniya parlamenti oktyabrın 27-də bölgəni müstəqil dövlət elan edib.
Oktyabrın 28-də rəsmi Madrid Kataloniya hökumətini və parlamentini buraxıb, idarəçilik səlahiyyətlərinin mərkəzi orqanlara ötürülməsi, dekabrın 21-də vilayətdə yeni parlament seçkisinin keçirilməsi barədə qərar çıxarılıb.
Vilayətin başçısı (prezident) Karles Puçdemont da vəzifədən götürülüb, Kataloniyaya rəhbərlik baş nazirin birinci müavini Sorayya Saensə həvalə olunub.
