Bakıya sərmayə qoyuluşu 3,1 faiz artıb
Bakı Şəhər Statistika İdarəsi paytaxtın sosial-iqtisadi göstəricilərini açıqlayıb. Novator.az-ın məlumatına görə, hesabatda bildirilir ki, 2017-ci ilin yanvar-sentyabr aylarında sənayedə istehsalın və xidmətlərin həcmi 5,1 faiz azalaraq 24 milyard manat təşkil edib. Məhsulun 81,7 faizi mədən sektorunun payına düşüb. Sənayedə qeyri-dövlət sektorunun payı 81,3 faiz olub.
9 ayda şəhərin iqtisadi və sosial sahələrinin inkişafı üçün əsas kapitala 8 milyard 572,6 milyon manat və ya əvvəlki ilin müvafiq dövrü ilə müqayisədə 3,1 faiz çox vəsait yönəldilib. Ümumi sərmayənin 17,4 faizi dövlət, 82,6 faizi qeyri-dövlət sektorunun sərmayədarlarının payına düşüb. Əsas kapitala yönəldilmiş vəsaitlərin 68,8 faizi tikinti-quraşdırma işlərinə sərf edilib.
Yanvar-sentyabr aylarında pərakəndə ticarət dövriyyəsinin həcmi 2016-cı ilin 9 ayına nisbətən müqayisəli qiymətlərlə 2,7 faiz artaraq 13 milyard 378,1 milyon manat olub.
İctimai iaşə dövriyyəsinin həcminin əvvəlki ilin eyni dövrü ilə müqayisədə real ifadədə 3,8 faiz artaraq 631,8 milyon manat olduğu bildirilir.
Əhaliyə göstərilən ödənişli xidmətlərin həcmi 3 milyard 627,9 milyon manat olub.
2017-ci ilin yanvar-avqust aylarında şəhərin nəqliyyat müəssisələrində orta aylıq əməkhaqqı 850,9 manat, rabitə müəssisələrində orta aylıq əməkhaqqı 1088,7 manat təşkil edib.
