Avakovun oğlu zaminə buraxıldı
Ukrayna paytaxtı Kiyevin Solomen Rayon Məhkəməsi noyabrın 1-də daxili işlər naziri Arsen Avakovun oğlu Aleksandr Avakovu zaminə buraxıb. Novator.az-ın məlumatına görə, məhkəmə Aleksandr Avakovun üzərinə bütün pasportlarını Dövlət Miqrasiya Xidmətinə təhvil vermək öhdəliyi qoyub.
Məhkəmə daxili işlər nazirinin sabiq müavini Sergey Çebotarın və “Turboseo” şirkətinin başçısı Vladimir Litvinin də azadlığa buraxılması barədə qərar qəbul edib. Sergey Çebotar zamində olacaq, Vladimir Litvin isə elektron bilərzik taxmaq öhdəliyi götürüb.
Milli Antikorrupsiya Bürosu bu şəxsləri oktyabrın 31-də tutmuşdu. Onlar 2014-2015-ci illərdə Daxili İşlər Nazirliyi üçün çantaların şişirdilmiş qiymətə alınması işində, dövlətə 520 min dollara yaxın ziyan vurmaqda təqsirləndirilir.
Arsen Avakov Bakı ermənisidir. 1964-cü ildə anadan olub. İki yaşından Ukraynada yaşayır. Xarkov Politexnik İnstitutunu bitirib. Uzun müddət bizneslə məşğul olub. 2005-2010-cu illərdə Xarkov vilayətinin qubernatoru postunu tutub, sonra Ali Radanın deputatı seçilib. 2014-cü il fevralın 22-dən daxili işlər naziridir.
