Üçüncülük yolu
Futbol icmalçısı Rasim Mövsümzadə UEFA Çempionlar Liqasının qrup raundunda Azərbaycanı təmsil edən “Qarabağ” komandasının şansları ilə bağlı sualı cavablandırıb.
C qrupunda yarışan “Qarabağ” sona iki tur qalmış 2 xalla dördüncü pillədə dayanır. Komanda İngiltərənin “Çelsi” klubuna 0:6, İtaliya “Roma”sına 1:2 hesabı ilə uduzub, İspaniyanın “Atletiko” klubu ilə xalları bölüb (0:0, 1:1).
Dörd turdan sonra C qrupuna 8 xalla “Roma” liderlik edir. “Çelsi” 7 xalla ikinci, “Atletiko” 3 xalla üçüncüdür.
Qrup mərhələsindən növbəti raunda adlamaq üçün ən azı ikinci yeri tutmaq gərəkdir. Üçüncü yeri tutan komanda Avropa Liqasına transfer olunur.
Noyabrın 22-də “Qarabağ” Bakıda “Çelsi”ni qəbul edəcək. Həmin gün “Atletiko” Madriddə “Roma” ilə üz-üzə gələcək. Qrup turnirinə dekabrın 5-də “Çelsi “– “Atletiko” və “Roma” – “Qarabağ” matçları ilə yekun vurulacaq.
Rasim Mövsümzadə Novator.az deyib ki, son oyunlarda əzmkar çıxışı ilə azarkeşləri sevindirsə də, “Qarabağ”ın Çempionlar Liqasında 1/8 finala çıxması real görünmür: “Komandamız qrupda son iki turda qarşılaşacağı “Çelsi”dən 5, “Roma”dan isə 6 xal geri qalır. Amma Azərbaycan çempionunun qrup üçüncüsü kimi mübarizəni Avropa Liqasında davam etdirmək şansları heç də az deyil. Bunun üçün “Qarabağ” qalan iki oyunda azı 1 xal toplamalıdır ki, “Atletiko”ya çatsın. Təbii ki, bunun üçün yaxşı formada olmayan Madrid təmsilçisinin (bütün turnirlərdə son 8 oyununda cəmi 1 qələbə qazanıb) də qarşıdakı matçlarda uduzması şərtdir.
Xallar bərabər olsa, iki komandanın şəxsi görüşlərinə baxılacaq. Bu baxımdan səfərdə rəqibinə qol vurduğuna görə “Qarabağ” “Atletiko”dan irəlidə olacaq.
Hər nə qədər çətin görünsə də, “Qarabağ”ın qarşıdakı iki oyundan birində qalib gəlməsi, “Atletiko”nun isə qələbəyə həsrət qalması da komandamızın Avropa Liqası yolunda yaşıl işıq olacaq”.
