Madridə “Qarabağ” möhürü
Azərbaycan təmsilçisi “Qarabağ” UEFA Çempionlar Liqasının qrup mərhələsində daha bir uğurlu nəticə əldə edib. Novator.az-ın məlumatına görə, C qrupunda yarışan “Qarabağ” dördüncü turu start günü – oktyabrın 31-i İspaniya paytaxtı Madriddə “Atletiko”nun qonağı olub. Oyun 1:1 hesabı ilə bitib.
Qrupdakı digər matç İtaliya paytaxtında keçirilib, yerli “Roma” İngiltərənin “Çelsi” komandasını 3:0 hesabı ilə udub.
“Qarabağ” əvvəlki oyunlarda “Çelsi”yə 0:6, “Roma”ya 1:2 hesabı ilə uduzmuş, “Atletiko” ilə xalları bölmüşdü (0:0).
Dörd turdan sonra C qrupuna 8 xalla “Roma” liderlik edir. “Çelsi” 7 xalla ikinci, “Atletiko” 3 xalla üçüncü, “Qarabağ” 2 xalla sonuncu pillədə dayanır.
Qrup mərhələsindən növbəti raunda adlamaq üçün ən azı ikinci yeri tutmaq gərəkdir. Üçüncü yeri tutan komanda Avropa Liqasına transfer olunur.
C qrupunda digər oyunların təqvimi:
22 noyabr
“Qarabağ” – “Çelsi”
“Atletiko” – “Roma”
5 dekabr
“Çelsi “– “Atletiko”
“Roma” – “Qarabağ”.
31 oktyabr oyunlarından sonra B qrupundan “Bavariya” (Almaniya) və PSJ (Fransa) növbəti mərhələyə keçidi təmin ediblər.
