Məşğulluq tədbirlərinin hansı nəticələri var?
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti bu il 52 rayon və şəhərdə əmək yarmarkaları keçirib. Rəsmi hesabata görə, bu məşğulluq tədbirlərində 3705 nəfər şəxsə vakant iş yerlərinə göndərişlər verilib. Göndəriş verilən şəxslərdən 80 faizinin məşğulluğu təmin olunub.
Əmək yarmarkalarında 194 nəfər şəxs ödənişli ictimai işlərə göndəriş alıb. Peşə və ixtisasının olmaması səbəbindən özünə münasib iş yeri tapa bilməyən və ya peşə bacarığına uyğun gələn iş olmadığı üçün peşəsini dəyişmək istəyən 245 nəfər vətəndaş peşə hazırlığı və əlavə təhsil kurslarına cəlb edilib.
Ümumilikdə 9 ayda Dövlət Məşğulluq Xidməti 41,6 min nəfər şəxsi münasib işlərlə təmin edib. Xidmətin xətti ilə 2698 nəfər, 1 saylı Sağlamlıq İmkanları Məhdud Gənclərin Peşə Reabilitasiya Mərkəzinin xətti ilə isə 215 nəfər gənc peşə hazırlığı və əlavə təhsil kurslarına qəbul olunub.
