Kataloniyanın müvəqqəti başçısı
Novator.az İspaniyanın Kataloniya vilayətinin müvəqqəti başçısı Sorayya Saensin bioqrafiyasını oxucuların diqqətinə çatdırır.
Kataloniya vilayətinin parlamenti oktyabrın 27-də bölgəni müstəqil dövlət elan edib. Oktyabrın 28-də İspaniyanın baş naziri Kataloniya hökumətini və parlamentini buraxıb, idarəçilik səlahiyyətlərinin mərkəzi orqanlara ötürülməsi, dekabrın 21-də vilayətdə yeni parlament seçkisinin keçirilməsi barədə qərar verib.
Vilayətin başçısı (prezident) Karles Puçdemont da vəzifədən götürülüb, Kataloniyaya rəhbərlik baş nazirin birinci müavini Sorayya Saensə həvalə olunub.
Novator.az bildirir ki, Sorayya Saens (Mariya Sorayya Saens de Santamariya Anton) 1971-ci il iyunun 10-da Valyadolid şəhərində anadan olub.
1994-cü ildə Valyadolid Universitetini hüquqçu ixtisası ilə bitirib. Bir müddət Leon şəhərində vəkil işləyib, eyni zamanda Madriddəki III Karles Universitetində inzibati hüquqdan dərs deyib.
2004-cü ildən İspaniya parlamentinin aşağı palatasının deputatıdır. Hakim Xalq Partiyasının öncül şəxslərindən olan Sorayya Saens 2011-ci ildən baş nazirin birinci müavinidir. O, baş nazirin administrasiyasına rəhbərlik edir, hökumət sözçüsü, ərazi administrasiyaları üzrə nazir funksiyalarını da daşıyır.
Ailəlidir, bir oğlu var.
