Bərzani postdan getdi
İraqdakı kürd muxtar vilayətinin parlamenti 29 oktyabr iclasında bölgənin rəhbəri Məsud Bərzaninin istefasını qəbul edib. Məsud Bərzani parlamentə məktubunda postundan getdiyini açıqlamışdı. Onun mandatı noyabrın 1-də bitir.
Məsud Bərzani 2005-ci ildə parlamentdə, 2009-cu ildə isə birbaşa seçkidə muxtariyyətin rəhbəri seçilib. Həmin vaxtdan bəri onun mandatı bir neçə dəfə uzadılıb.
Novator.az xatırladır ki, kürd muxtariyyətinin sentyabrın 25-də keçirdiyi referenduma gələnlərin 92,7 faizi Kürdüstan regionu və ondan kənardakı kürd ərazilərində müstəqil dövlət yaratmağa tərəfdar çıxıb. Rəsmi Bağdad, qonşu ölkələr və beynəlxalq güclər referendumu qanunsuz sayır, nəticələri tanımır.
