Naxçıvanın yeni sosial-iqtisadi göstəriciləri
Naxçıvan Muxtar Respublikasının Dövlət Statistika Komitəsi yeni hesabat açıqlayıb. Hesabata görə, 2017-ci ilin yanvar-sentyabr aylarında muxtar respublikada ümumi daxili məhsul istehsalının dəyəri 1 milyard 949 milyon manatdan artıq olub, bu da bir il öncəki göstəricidən 1,6 faiz çoxdur.
Hər bir nəfərə düşən ümumi daxili məhsulun dəyəri əvvəlki ilin müvafiq dövrünə nisbətən 5,5 faiz artaraq 4327,4 manata çatıb.
AZƏRTAC bildirir ki, ümumi daxili məhsulun tərkibində ilk yeri 28,2 faizlik payla sənaye tutub. 9 ayda muxtar respublikada 781,4 milyon manat dəyərində sənaye məhsulu istehsal olunub, bu da əvvəlki ilin müvafiq dövründəki göstəricini 1,3 faiz üstələyib.
Kənd təsərrüfatı məhsulu 3,8 faiz, nəqliyyat sektorunda yük daşınması 2,1 faiz, informasiya və rabitə xidmətlərinin dəyəri 1,9 faiz, pərakəndə əmtəə dövriyyəsi 1,4 faiz, əhaliyə göstərilən ödənişli xidmətlər 1,8 faiz, ixrac 1,3 faiz, əhalinin gəlirləri 1,2 faiz artıb.
