Sosial ödənişlərlə bağlı yeni hesabat
Oktyabrın 26-da açıqlama yayan Əmək və Əhalinin Sosial Müdafiəsi Nazirliyi bildirir ki, hazırda 1 milyon 330 min nəfər əmək pensiyası ilə təmin edilir. Pensiyaların orta aylıq məbləği 1 oktyabr 2017-ci ilə 203,2 manat, o cümlədən yaşa görə pensiyanın orta aylıq məbləği 226 manat olub.
Açıqlamaya əsasən, ölkə əhalisinin 4,5 faizi və ya 460 min nəfər müxtəlif növ müavinətlər alır: “Müharibə əlilləri və onlara bərabər tutulanlara aylıq sosial müavinət və ya əmək pensiyası ilə bərabər prezidentin aylıq təqaüdü də ödənir. Həmin təqaüdün məbləği I qrup əlillər üçün 165 manat, II qrup əlillər üçün 143 manat, III qrup əlillər üçün 110 manatdır”.
Şəhid ailələrinə ödənilən prezident təqaüdünün isə 220 manat olduğu bildirilir: “Şəhidlərin ailə üzvlərinin əmək pensiyasının baza hissəsinin üzərinə əlavə də hesablanır. Qarabağ müharibəsi əlillərinin və şəhid ailələrinin hər bir uşağına görə aylıq sosial müavinət, əmək pensiyası almaq hüququ olmayan şəhid ailəsi üzvlərinə kommunal, nəqliyyat və digər xidmətlər üçün aylıq sosial müavinət də verilir.
Prezident İlham Əliyevin 20 iyun 2014-cü il sərəncamına uyğun olaraq 607 nəfər Qarabağ müharibəsi əlili və şəhid ailəsi yeni mənzillərlə təmin olunub. Ümumilikdə indiyədək nazirliyin xətti ilə 5560 nəfər əlil və şəhid ailəsinə mənzil verilib. 5,9 min nəfər müharibə əlili və onlara bərabər tutulan şəxsə dövlət büdcəsi hesabına minik avtomobili təqdim olunub.
Hazırda 97,2 min ailənin 400,4 min nəfər üzvü ünvanlı sosial yardım alır. 2017-ci ili oktyabrın 1-nə ünvanlı dövlət sosial yardımının bir ailəyə düşən orta aylıq məbləği 150 manat təşkil edib”.
Dövlət Məşğulluq Xidməti bu ilin 9 ayında 41,6 min nəfər şəxsi münasib işlərlə təmin etdiyi də bildirilir.
