REAL-a yer ayrılmadı
Respublikaçı Alternativ (REAL) Hərəkatının partiyaya çevrilmək üçün oktyabrın 29-na təyin etdiyi təsis qurultayına yer ayrılmayıb.
REAL qurultay üçün ya “Təbriz” və “Bakı” kinoteatrlarından birinin, ya da Əmircan qəsəbəsində yerləşən Səttar Bəhlulzadə adına mədəniyyət sarayının ayrılmasını istəyirdi. Bu məqsədlə hərəkatın rəsmi qurumlara ünvanladığı müraciətə oktyabrın 26-da Bakı Şəhər Mədəniyyət və Turizm Baş İdarəsi cavab verib.
Novator.az-ın məlumatına görə, cavab məktubunda bildirilib ki, “Təbriz” və “Bakı” kinoteatrları Bakı Şəhər Mədəniyyət və Turizm Baş İdarəsinin balansında deyil, Səttar Bəhlulzadə adına mədəniyyət sarayında isə oktyabrın 29-u film nümayiş olunacaq. Bu səbəbdən idarə sözügedən məkanların qurultay üçün ayrılmasını mümkünsüz sayıb.
REAL Hərəkatı 2008-ci ildə yaradılıb. Hərəkatın lideri İlqar Məmmədov 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 7 il azadlıqdan məhrumetmə cəzası alıb.
2016-cı ildə hərəkat partiyaya çevrilmək niyyətini elan edib, həmin ilin martında partiya quruculuğu üzrə təşkilat komitəsi yaradılıb. 2017-ci ildə isə REAL hərəkatdan partiyaya çevrilmək üçün oktyabrın 29-na qurultay təyin edib.
Qurultayda müzakirə olunacaq nizamnamə layihəsində Respublikaçı Alternativ Partiyasının (qısa adı REAL Partiya olacaq) ali orqanı kimi Məclis nəzərdə tutulur. Layihəyə əsasən, partiyanın cari fəaliyyətinə İdarə Heyəti rəhbərlik edəcək.
