Mehman Əliyev beynəlxalq mükafata namizəddir
“Sərhədsiz reportyorlar” beynəlxalq media təşkilatı və “TV5-Monde” beynəlxalq televiziyası noyabrın 7-də 2017-ci ilin Mətbuat Azadlığı Mükafatını təqdim edəcək. Tədbir Strasburqda, ümumdünya demokratiya forumu çərçivəsində keçiriləcək, bir jurnalist, bir bloqçu və media orqanına mükafat veriləcək.
Azərbaycandan “Turan” informasiya agentliyinin direktoru Mehman Əliyev jurnalist bölümündən mükafata namizəddir.
Xəbəri Azadliq.org yayıb.
Novator.az xatırladır ki, Vergilər Nazirliyinin Vergi Cinayətlərinin İbtidai Araşdırılması Departamenti “Turan”a qarşı vergi ödəməmək ittihamı ilə cinayət işinə başlayıb. Avqustun 24-də agentliyin direktoru Mehman Əliyev bu iş üzrə həbs edilib, sentyabrın 11-də başqa yerə getməmək iltizamı ilə azadlığa buraxılıb.
İstintaq iddia edir ki, Mehman Əliyev 2010-2014-cü illərdə dövlət qeydiyyatına alınmamış qrant müqavilələri üzrə 148310 manat məbləğində qanunsuz gəlir əldə edib, 2010-2016-cı illərdə 60080 manat məbləğində mənfəət vergisini dövlət büdcəsinə ödəməkdən yayınıb.
Vergi ödəməkdən yayınma üzrə cinayət işi çərçivəsində “Turan”ın fəaliyyəti məhdudlaşıb.
60 yaşlı Mehman Əliyev Moskva Dövlət Universitetinin jurnalistika fakültəsinin məzunudur. “Molodyoj Azerbaydjana” qəzetinin, “Azərinform” agentliyinin müxbiri, “Xazar” jurnalının məsul katibi olub, prezidentin mətbuat xidməti rəhbərinin müavini vəzifəsində çalışıb. “Turan” informasiya agentliyini 1990-cı ildə təsis edib.
