Mitinqə razılıq verildi
Bakı Şəhər İcra Hakimiyyəti Demokratik Qüvvələrin Milli Şurasının oktyabrın 28-nə planlaşdırdığı mitinqə razılıq verib.
Mitinq saat 15-dən 17-dək Yasamal rayonundakı İdman-Sağlamlıq Kompleksinin stadionunda (“İnşaatçılar” metro stansiyasının yanı) keçiriləcək.
Milli Şuranın bəyan etdiyinə görə, aksiyada məqsəd korrupsiyaya, insan hüquqlarının tapdanmasına etiraz bildirmək, siyasi məhbusların azadlığa buraxılmasını tələb etməkdir.
Demokratik Qüvvələrin Milli Şurası bu il sentyabrın 23-də və oktyabrın 7-də eyni tələblərlə paytaxtda mitinqlər keçirib. Bakı Şəhər İcra Hakimiyyətinin sanksiyalaşdırdığı həmin aksiyalar da Yasamal rayonundakı İdman-Sağlamlıq Kompleksinin stadionunda olub.
Novator.az bildirir ki, Milli Şura 2013-cü ildə yaradılıb. Quruma Cəmil Həsənli və Əli Kərimli liderlik edir.
